مذكرات محمد سقراط ( الحلقة السادسة)

فالساحة لي كنا كنخرجو ليها كانت عامرة بلابارايات ديال التيليكارط , و كل لاباراي مكتوب فوق منها رقم الشامبري , و على كل وحدة كاين جوقة ديال البشر , السبان حاضر فكل تانية و مرة مرة كتنوض مضاربات ... دابا ها الساحة عامرة لابارايات و لكن آ ش جا ميوصلك ليهم ....

دويت مع ابراهيم :_ لي بغا يدوي فالتيليفون كيفاش ؟

_دبر على تيليكارط و آجي نهدرك فأي واحد بغيتي ..

_و بغيت ندوي غي فديال شامبرينا ؟

شد الصف مع الدراري و ملي يدور الساروت تسابق معاهم ؟

لحد الآن تبدو الأمور سهلة و بسيطة شد الصف و تسابق و غادي تدوي فالتيليفون ...و لكن فالعشية قبل أن يدور الساروت بربع ساعة كان هناك من تسمر أمام الكرية , و ما أن دار الساروت و فتح الباب حتى بدأ الركض و بقوة و بالإستعانة بالكودات المهم دير جهدك باش تكون من اللولين و راه كل شيئ مباح .

للأسف وصلت أنا النمرة 13 هذا ما إستطاع جسدي و ذكائي أن يحققه لي . بقيت كنتسنى نوبتي .. القانون كان هو 3 دقائق للواحد يومية , و لكن فالواقع كان لي كيدوي حتى لعشرة دقائق , و كان لي جوج دقايق مكيكملهاش , دغية كيقمعو شي واحد و الطبيعة هي لي كانت مسؤولة على هادشي حيث مقاداتناش بحال بحال من النهار اللول ....كنت أفكر لمن سأهاتف واش للأب ديالي , أو للطاهر أو لخديجة , للأسف الأم ديالي مكنتش حافظ نمرتها , و أنا نقرر نهاتف الأب جوج دقايق و الطاهر جوج و الدقيقة الزايدة غادا تدوز على وجه ولد عمي طبعا , دورت للواليد طمأنته على حالتي : راه بيخير الواليد راه بحال السوق فين دوزت النص فحياتي , أشوف متخاف والو راه غادي يدوز هادشي راه تلاقيت ولاد الحومة , المهم فوقاش غادي تدوز عندي ...وا جيب ليا كاشة تكون عيانة و شي تبديلة أو جوج و صندالة ديال الميكة و شي باكيات ديال الكاروو تيليكارط  و حتى تجي و نقوليك آش تجيب ديك الساعة ....

دورت للطاهر : أفين أعشيري آش كاين واش غدوز عندي , وا ضروري تدوز راك عارف باش ندويو فهاد الحصلة آشنو واش كاين شي أمل نخرج أو صافي غبر ليا الشقف .... كان يطمئنني و يعدني أن كل شيئ سيكون بخير,  كأي محامي كان متفائلا , أشوف قول للواليدة متقلق ماوالو و قوليها راه غادي نخرج و خديجة حتى هي صبرها أعشيري, راك عارفها ماغاداش تسكت من لبكا بحالها بحال الواليدة أو أكثر .

أنهيت مكالمتي و بينما أنا أدخن سيجارة ماركيز منقوص ليها من الفيلتر , ناضت مضاربة مقودة بين جوج معايا فالشومبر , الأول كان يهاتف موالين دارهم حسب قوله ( يقصد زوجته ) , إنتهى وقته و لم يرد أن ينهي المكالمة , بداعي أن محادثة موالين دارهم شيئ أكثر قيمة من باقي المكالمات الفارغة التي يتجاوز أثنائها العديد وقتهم القانوني , و تدرع بأن قزيبرة دوا 6 دقايق و غي مع قحبة و مهدر معاه تاواحد ...سمعو قزيبرة و قاليه القحبة هي مك شكون بغات تكون هاد مرتك كاع ياك حتى شبعات قلوة فبين لعراصي عاد تزوجتيها و دايرلينا فيها دابا فيلم .... هاديك راه راجل عليك يا المرض .... حاصل بشنتيفة ديال لحشيش و جايب معاك جوج فالمونتيف دابال نتا راجل نتا .

وبدا التخاميج , و أرى معندك ملي كيفكوهم الدراري كيبداو ينشرو سليباتهم :

_ نتا غي ولد قوادة ... نتا غي زامل كنتي كتحوى فالبيبي .... كان كيركب عليك فلان و يديليك ديالك ..... و طبعا الكم الأكبر من السبان كان يتجه جهة العنصر النسوي في أسرهم و جهة مؤخراتهم ..... تما فين كيتقرص بنادم , و فين كاين شرفو أما فزكو أو فطبون مو ولا ختو ......فارقهم الدراري و دازت بسلام ......

دوات الزواكة معلنة إنتهاء اليوم .... بدا بنادم كيدخل للشنابر .... فالكروة( كولوار) لي كنت فيها أكتشفت وجود كتابات على الحائط ... ليست للسجناء و أنما كتبتها الإدارة كنوع من التوعية , و أغلبها آيات قرئانية و حكم و منها آية : الشيطان يعدكم الفقر و الله يعدكم الغنى ..................تأملت فيها كثيرا و بدت صادقة أكثر , ها طريق الشيطان فين كتوصل , و لكن فالحبس شفت شي ناس تابعين طريق الشيطان و مكيعرفوش الله فين جا و فلوسهم تحرق ما تقادى , وشفت العربي لفقيه تابع طريق الله و هو الإمام عندنا فالشامبري, و مسكين عطا شي شيكات على ما تيسر الأمور و يخلصهم ساعة باينة كان تابع طريق الشيطان فالسر حيث أمورو متيسراتش و الشيكات دفعوهم ليه , و هاهو كيضرب فالحبيسي , كيدوز الوقت فالصلاة و قرائة القرآن , و كما يقول هو هذا ابتلاء من عند الله معرفنا الخير فين كاين ..... نيت معرفنا الخير فين كاين .... سير عالله ..... الله يسرلينا فهاد المونتيف .